ବର୍ତମାନ ଷ୍ଟାରମାନଙ୍କ ଉପରେ କାହାର ନଜର ଲାଗିଯାଇଛି । ଲାଗୁଛି ଯେମିତି ଏମାନଙ୍କ ଗ୍ରହଦଶା ଖରାପ ଅଛି । କେତେବେଳେ ଓଲିଉଡ଼ ତା କେତେବେଳେ ବଲିଉଡ । ବିବାଦ ଘରରେ ଛନ୍ଦି ହୋଇଯାଇଛନ୍ତି ଷ୍ଟାର । ବଲିଉଡ୍ର ବିବାଦୀୟ ତଥା ଡ୍ରାମା କୁଇନ୍ ଅଭିନେତ୍ରୀ ରାକ୍ଷୀ ସାୱନ୍ତ ଗିରଫ ହୋଇଥିବା ସୂଚନା ମିଳିଛି। ଅଭିନେତ୍ରୀ ଶର୍ଲିନ ଚୋପ୍ରାଙ୍କ ଟ୍ୱିଟ୍ରୁ ଏହା ଜଣାପଡ଼ିଛି। ଶର୍ଲିନ ଟ୍ୱିଟ୍ କରି ଦାବି କରିଛନ୍ତି ଯେ, ଆମ୍ବୋଲି ପୋଲିସ୍ ରାକ୍ଷୀଙ୍କୁ ଗିରଫ କରିଛି।
ଏହାସହ FIR ସମ୍ପର୍କିତ ତଥ୍ୟ ମଧ୍ୟ ସେ ଶେୟାର କରିଛନ୍ତି। କୁହାଯାଉଛି ଯେ, ଶର୍ଲିନଙ୍କ ଅଭିଯୋଗ ଆଧାରରେ ଆମ୍ବୋଲି ପୋଲିସ୍ ରାକ୍ଷୀଙ୍କୁ ହେପାଜତକୁ ନେଇଛି।
ଏଥିରୁ ଜଣାପଡ଼ୁଛି, ଖୁବ୍ଶୀଘ୍ର ରାକ୍ଷୀଙ୍କୁ ଅନ୍ଧେରୀ କୋର୍ଟରେ ହାଜର କରାଯିବ। ସୂଚନାଥାଉ କି, ପୂର୍ବତନ ବିଗ୍ ବସ୍ ଷ୍ଟାର୍ ରାକ୍ଷୀଙ୍କ ବିରୋଧରେ ଶର୍ଲିନ ଅଭିଯୋଗ ଆଣିଥିଲେ। ରାକ୍ଷୀ, ତାଙ୍କର ଆପତ୍ତିଜନକ ଫଟୋ ଓ ଭିଡିଓ ସୋସିଆଲ୍ ମିଡିଆରେ ପୋଷ୍ଟ କରିଥିବା ଶର୍ଲିନ ଅଭିଯୋଗ କରିଥିଲେ। ପୂର୍ବରୁ ମଧ୍ୟ ରାକ୍ଷୀ ଓ ଶର୍ଲିନଙ୍କ ମଧ୍ୟରେ କଥା କଟାକଟି ହୋଇଥିଲା।
MeToo ସହ ଜଡ଼ିତ ଫିଲ୍ମ ନିର୍ମାତା ସାଜିଦ ଖାନ୍ଙ୍କ ବିରୋଧରେ ଶର୍ଲିନଙ୍କ ଅଭିଯୋଗ ଉପରେ ରାକ୍ଷୀ ମତ ରଖିଥିଲେ। ଶର୍ଲିନ ଆଣିଥିବା ଅଭିଯୋଗକୁ ରାକ୍ଷୀ ଖଣ୍ଡନ କରିବା ସହ ତାଙ୍କର ମଜାକ ଉଡ଼ାଇଥିଲେ। ଏହାପରେ ଉଭୟ ଅଭିନେତ୍ରୀଙ୍କ ମଧ୍ୟରେ କଥା କଟାକଟି ହୋଇଥିଲା। ଶର୍ଲିନ ତାଙ୍କ ବିରୋଧରେ ଅପମାନଜନକ ଟିପ୍ପଣୀ ଦେଇଥିବା ରାକ୍ଷୀ ଅଭିଯୋଗ କରିଥିଲେ।