ନୟାଗଡ: ଦଶପଲ୍ଲା ଶାଳଭଙ୍ଗା ଜଙ୍ଗଲରେ ରାସ୍ତା କଡ ଡିଭାଇଡରରେ ଆମ୍ବୁଲାନ୍ସ ପିଟି ହୋଇଯିବାରୁ ୩ ଜଣ ପ୍ରାଣ ହରାଇ ଥିବାବେଳେ ଜଣେ ଜଣେ ଗୁରୁତର ହୋଇଛନ୍ତି । ସୂଚନା ଅନୁଯାୟୀ ବଲାଙ୍ଗୀର ଜିଲ୍ଲା ଦେଓଗାଁର ଈଶ୍ୱର ସାହୁ ଭୁବନେଶ୍ୱରର ଏକ ହସ୍ପିଟାଲରେ ଚିକିତ୍ସିତ ହେଉଥିବାବେଳେ ପ୍ରାଣ ହରାଇଥିଲେ । ଏହାପରେ ତାଙ୍କ ପୁଅ ନେତ୍ରଭାନୁ ଏବଂ ସଂପର୍କୀୟ ମାନେ ଭୁବନେଶ୍ୱରରୁ ବଲାଙ୍ଗୀର ଜିଲ୍ଲା ଦେଓଗାଁ ଅଭିମୁଖେ ଆମ୍ବୁଲାନ୍ସରେ ମୃତଦେହ ନେଇ ଯାଉଥିଲେ । ହେଲେ ଦଶପଲ୍ଲା ୫୭ ନମ୍ବର ଜାତୀୟ ରାଜପଥ ଶାଳଭଙ୍ଗା ଜଙ୍ଗଲରେ ରାସ୍ତା କଡ ଡିଭାଇଡରରେ ଆମ୍ବୁଲାନ୍ସ ପିଟି ହେବା ଫଳରେ ପୁଅ ନେତ୍ରଭାନୁ ସାହୁ ଗୁରୁତର ହୋଇଥିବାବେଳେ ସଂପର୍କୀୟ ୩ ଜଣଙ୍କର ମୃତ୍ୟୁ ହୋଇଛି । ସନ୍ଧ୍ୟା ପ୍ରାୟ ସାଢେ ୫ଟାରେ ଏହି ଦୁର୍ଘଟଣା ଘଟିଥିବା ସୂଚନା ପାଇ ଵାଣିଗୋଚ୍ଛା ପୁଲିସ ଘଟଣାସ୍ଥଳରେ ପହଞ୍ଚି ସମସ୍ତଙ୍କୁ ଉଦ୍ଧାର କରି ଦଶପଲ୍ଲା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲା । ସେଠାରେ ପ୍ରତାପ ବାଗ, ଶୀର୍ଷ ବାଗଙ୍କ ସମେତ ମୋଟ ୩ ଜଣଙ୍କୁ ଡାକ୍ତର ମୃତ ଘୋଷଣା କରିଛନ୍ତି । ଈଶ୍ବର ସାହୁଙ୍କ ପୁଅ ନେତ୍ରଭାନୁ ସାହୁଙ୍କୁ ଗୁରୁତର ଅବସ୍ଥାରେ ଭୁବନେଶ୍ୱର ସ୍ଥାନାନ୍ତରିତ କରାଯାଇଛି ।