ଭୁବନେଶ୍ୱର: ଅବସର ପରେ ବି ସରକାରୀ ପଦବୀରେ ଥିଲେ । କିନ୍ତୁ ଏବର ମୋହନ ସରକାରରେ ହଟିଲେ । ଅବସର ପରେ ବି ସରକାରୀ ପଦବୀରେ ଥିବା ୨ ଅଧିକାରୀଙ୍କୁ ହଟାଯାଇଛି । ସୁଡା ପ୍ରକଳ୍ପ ନିର୍ଦ୍ଦେଶକ ଓ ପୌର ନିର୍ଦ୍ଦେଶକ ପଦରୁ ୨ ଅଧିକାରୀଙ୍କୁ ହଟାଯାଇଛି । ଅବସର ପରେ ସୁଡା ନିର୍ଦ୍ଦେଶକଭାବେ ସାରଦା ପ୍ରସାଦ ପଣ୍ଡା ନିଯୁକ୍ତ ପାଇଥିଲେ । ତେବେ ତାଙ୍କୁ ଏବେ ହଟାଯାଇ ତାଙ୍କ ସ୍ଥାନରେ ରବୀନ୍ଦ୍ର କୁମାର ସାହୁଙ୍କୁ ସୁଡା ପ୍ରକଳ୍ପ ନିର୍ଦ୍ଦେଶକଭାବେ ନିଯୁକ୍ତ କରାଯାଇଛି । ସେହିପରି ଅବସରପରେ ପୌର ନିର୍ଦ୍ଦେଶକଭାବେ ସଂଗ୍ରାମଜିତ ନାୟକଙ୍କୁ ମଧ୍ୟ ହଟାଯାଇଛି । ତାଙ୍କ ସ୍ଥାନରେ ଦେବାଶିଷ ସିଂହଙ୍କୁ ପୌର ନିର୍ଦ୍ଦେଶକକାଭାବେ ନିଯୁକ୍ତ କରାଯାଇଛି । ପ୍ରକାଶ ଯେ ବିଜେଡି ସରକାର ଅମଳରେ ଅବସର ଗ୍ରହଣ ପରେ ବି ବହୁ ଅଧିକାରୀଙ୍କୁ ପୁନଃନିଯୁକ୍ତି ଦିଆଯାଇଥିଲା । ଯାହାକୁ ସେତେବେଳେ ବିରୋଧୀ ଆସନରେ ବସିଥିବା ବିଜେପି ବିରୋଧ କରିଆସୁଥିଲା । ଏବେ ରାଜ୍ୟରେ ବିଜେପି ସରକାର ଶାସନଭାର ସମ୍ଭାଳିବା ପରେ ଅବସର ପରେ ନିଯୁକ୍ତି ପାଇଥିବା ବାବୁମାନଙ୍କୁ ବିଦା କରିବାରେ ଲାଗିଛନ୍ତି ।