ନୂଆଦିଲ୍ଲୀ: ଟୋକିଓ ଅଲିମ୍ପିକ୍ସରେ ଦେଶ ପାଇଁ ରୌପ୍ୟ ପଦକ ଜିତିଥିବା ଭାରୋତ୍ତୋଳକ ମୀରାବାଈ ଚାନୁଙ୍କ ପାଇଁ ମଣିପୁର ସରକାର ବଡ଼ ଉପହାର ଦେଇଛନ୍ତି। ମଣିପୁର ସରକାର ମୀରାବାଈ ଚାନଙ୍କୁ ଏଏସପି (କ୍ରୀଡ଼ା) ପଦରେ ନିଯୁକ୍ତି ଦେବାକୁ ନିଷ୍ପତ୍ତି ନେଇଛନ୍ତି। ଏହାସହ ରାଜ୍ୟ ସରକାର ପକ୍ଷରୁ ଚାନୁଙ୍କୁ ୧ କୋଟି ଟଙ୍କାର ପୁରସ୍କାର ରାଶି ଘୋଷଣା କରାଯାଇଛି। ମଣିପୁରର ମୁଖ୍ୟମନ୍ତ୍ରୀ ସଚିବାଳୟ ତରଫରୁ ଏହି ସୂଚନା ଦିଆଯାଇଛି।
ମୀରାବାଈ ଚାନୁ ଆଜି ଅପରାହ୍ଣରେ ସ୍ୱଦେଶ ଫେରିଛନ୍ତି। ଚାନୁ ଦେଶର ପ୍ରଥମ ଭାରୋତ୍ତୋଳକ, ଯିଏ ଅଲିମ୍ପିକ୍ସରେ ରୌପ୍ୟ ପଦକ ଜିତିଛନ୍ତି। ଏହା ପୂର୍ବରୁ ୨୦୦୦ ମସିହାରେ କର୍ଣ୍ଣମ ମାଲେଶ୍ୱରୀ ବ୍ରୋଞ୍ଜ ପଦକ ଜିତିଥିଲେ। ସ୍ୱଦେଶ ଫେରିବା ପରେ ମୀରାବାଈ କହିଥିଲେ, ମୋ ପାଇଁ ଏହା ବହୁତ ଚ୍ୟାଲେଞ୍ଜିଂ ଥିଲା। ପଦକ ଜିତିବା ନେଇ ମୋର ଏବଂ ମୋ କୋଚଙ୍କ ସ୍ୱପ୍ନ ଥିଲା। ରିଓ ଅଲିମ୍ପିକ୍ସକୁ ମୁଁ ଯାଇପାରିନଥିଲି। କିନ୍ତୁ ଏହା ପରେ ମୁଁ ଖୁବ୍ ପରିଶ୍ରମ କରିଥିଲି। ରିଓ ଅଲିମ୍ପିକ୍ସରୁ ମୁଁ ବହୁତ କିଛି ଶିଖିଛି।